លោកពូទីនបញ្ជាបង្កើនចំនួនកម្លាំងប្រដាប់អាវុធរុស្ស៊ីចំនួន១៧ម៉ឺននាក់
វិមានក្រឹមឡាំង និងក្រសួងការពារជាតិបានឱ្យដឹងថា ប្រធានាធិបតីរុស្ស៊ីលោក វ្ល៉ាឌីមៀ ពូទីន បានចុះហត្ថលេខាលើក្រឹត្យមួយដើម្បីបង្កើនចំនួនទាហានអតិបរមានៅក្នុងកងកម្លាំងប្រដាប់អាវុធរុស្ស៊ីដែលមានចំនួនរហូតដល់ជិត ១៧០,០០០នាក់ ខណៈការឈ្លានពានរបស់យោធារបស់ទីក្រុងមូស្គូក្នុងប្រទេសអ៊ុយក្រែននៅតែបន្តដល់ខែទី ២២ហើយ។ ក្រឹត្យរបស់លោកពូទីនត្រូវបានចេញផ្សាយដោយវិមានក្រឹមឡាំងកាលពីថ្ងៃទី១ ខែធ្នូនេះ បានចូលជាធរមានភ្លាមៗ ដែលបានជំរុញឱ្យចំនួនបុគ្គលិកយោធារុស្ស៊ីសរុបមានប្រហែល ២.២ លាននាក់ ក្នុងនោះមានទាំងទាហាន ១.៣២ លាននាក់។
នេះគឺជាការពង្រីកកងទ័ពលើកទីពីរហើយចាប់តាំងពីឆ្នាំ ២០១៨ មក។ កាលពីលើកមុនក្នុងខែសីហាឆ្នាំ ២០២២ លោកពូទីនបានបញ្ជាឱ្យពង្រីកចំនួនកងទ័ពចំនួន ១៣៧,០០០នាក់ ដែលកាលនោះមានរុស្ស៊ីមានបុគ្គលិកយោធាប្រហែល ២ លាននាក់ និងទាហានប្រហែល ១.១៥ លាននាក់។ នៅខែបន្ទាប់ លោកបានបញ្ជាឱ្យមានការចល័តទ័ពបម្រុងចំនួន ៣០ម៉ឺននាក់ ដើម្បីពង្រឹងកងកម្លាំងរុស្ស៊ីនៅក្នុងប្រទេសអ៊ុយក្រែន។ ចំនួននោះត្រូវបានរាប់ជាផ្នែកនៃកម្លាំងយោធាបច្ចុប្បន្ន។
ជុំវិញការបង្កើនចំនួនកងកម្លាំងប្រដាប់អាវុធនេះ ក្រសួងការពារជាតិរុស្ស៊ីបាននិយាយថាគឺដោយសារតែមានការគំរាមកំហែងកាន់តែខ្លាំងឡើងចំពោះប្រទេសខ្លួន ជុំវិញប្រតិបត្តិការយោធាពិសេសនៅអ៊ុយក្រែន និងការពង្រីកខ្លួនជាបន្តបន្ទាប់នៃអង្គការណាតូ។ ក្រសួងបាននិយាយក្នុងសេចក្តីថ្លែងការណ៍ថា៖«កងកម្លាំងប្រដាប់អាវុធរបស់ណាតូកំពុងត្រូវបានបង្កើតឡើងនៅក្បែរព្រំដែនរុស្ស៊ី ហើយប្រព័ន្ធការពារដែនអាកាស និងអាវុធវាយប្រហារកំពុងត្រូវបានដាក់ពង្រាយ»។
កាលពីខែធ្នូកន្លងទៅ រដ្ឋមន្ត្រីការពារជាតិរុស្ស៊ីលោក Sergei Shoigu បានប្រកាសថា ប្រទេសនេះត្រូវការកងកម្លាំងចំនួន ១.៥ លាននាក់ ដើម្បីធានាការបំពេញភារកិច្ចធានាសន្តិសុខជាតិរុស្ស៊ី។ កាលពីមុនវិមានក្រឹមឡាំង បានចាត់ទុកទំហំយោធារបស់ខ្លួនថាគ្រប់គ្រាន់ហើយ ប៉ុន្តែក្រោយមកក៏មានការផ្លាស់ប្តូរ បន្ទាប់ពីខ្លួនបានដាក់ក្តីសង្ឃឹមសម្រាប់ជ័យជម្នះយ៉ាងឆាប់រហ័សលើអ៊ុយក្រែន ចាប់តាំងពីវាបានឈ្លានពានក្នុងខែកុម្ភៈ ឆ្នាំ 2022 ។
រុស្ស៊ីបានអនុវត្តកិច្ចប្រឹងប្រែងជាច្រើនដើម្បីផ្តល់ការជំរុញដល់កំណើនកងទ័ពរបស់ខ្លួន រួមទាំងការកៀរគរអ្នកបម្រុង បង្កើតកងវរសេនាតូចស្ម័គ្រចិត្ត និងយុទ្ធនាការផ្សេងៗទៀតដើម្បីទាក់ទាញអ្នកចូលរួមបន្ថែមទៀត។ យោងតាមរបាយការណ៍ប្រព័ន្ធផ្សព្វផ្សាយ និងក្រុមសិទ្ធិមនុស្សមួយចំនួនបាននិយាយថា អាជ្ញាធររុស្ស៊ីក៏បានផ្តល់ការលើកលែងទោសដល់អ្នកទោសមួយចំនួនជាថ្នូរនឹងការដូរមកបំពេញកាតព្វកិច្ចយោធាផងដែរ។ បុរសរុស្ស៊ីទាំងអស់ដែលមានអាយុពី 18 ទៅ 27 ឆ្នាំ ត្រូវតែបម្រើក្នុងជួរយោធាមួយឆ្នាំ ដែលចាប់ផ្តើមនៅថ្ងៃទី ១ ខែមករាឆ្នាំ 2024។ ទោះជាយ៉ាងណាក៏ដោយ បុរសមួយចំនួនធំដោយសារតែចង់ជៀសវាងច្បាប់នេះបានយកលេសថាមានបញ្ហាហេតុផលសុខភាព ឬការពន្យាពេលទៅរៀននៅសាកលវិទ្យាល័យ៕
