ការប្រយុទ្ធគ្នាជាថ្មីនៅតំបន់ហ្គាហ្សាបានបន្តដល់ថ្ងៃទីពីរនៅថ្ងៃសៅរ៍សប្តាហ៍នេះ បន្ទាប់ពីកិច្ចពិភាក្សាដើម្បីបន្តបទឈប់បាញ់រយៈពេលមួយសប្តាហ៍ជាមួយក្រុមហាម៉ាស់បានដួលរលំ។ អ្នកសម្របសម្រួលបាននិយាយថា ការបន្តទម្លាក់គ្រាប់បែករបស់អ៊ីស្រាអែលកំពុងធ្វើឱ្យស្មុគស្មាញដល់ការប៉ុនប៉ងដើម្បីផ្អាកការប្រយុទ្ធម្តងទៀត។ យោងតាមសាក្សីបាននិយាយថាតំបន់ភាគខាងកើត និងភាគខាងត្បូងហ្គាហ្សា ស្ថិតនៅក្រោមការទម្លាក់គ្រាប់បែកយ៉ាងខ្លាំង ខណៈដែលពេលវេលាកំណត់បទឈប់បាញ់បានកន្លងផុតទៅភ្លាមៗនៅព្រឹកព្រលឹមថ្ងៃសុក្រ។
អ៊ីស្រាអែលបាននិយាយថា កងកម្លាំងផ្លូវគោក ផ្លូវអាកាស និងកងទ័ពជើងទឹករបស់ខ្លួនបានវាយប្រហារលើគោលដៅភេរវកម្មជាង ២០០ នៅហ្គាហ្សា ដោយជំរុញឱ្យជនស៊ីវិលភៀសខ្លួនដើម្បីជៀសវាងការប្រយុទ្ធគ្នា ខណៈក្រុមសិទ្ធិមនុស្សបានព្រមានម្តងហើយម្តងទៀតថាមិនមានកន្លែងសុវត្ថិភាពសម្រាប់ជនស៊ីវិលនៅក្នុងតំបន់ហ្គាហ្សាទេ។ គិតត្រឹមល្ងាចថ្ងៃសុក្រ ទី១ ធ្នូ មន្ត្រីប៉ាឡេស្ទីនបាននិយាយថា ការវាយប្រហាររបស់អ៊ីស្រាអែលបានសម្លាប់មនុស្ស១៨៤នាក់ របួសយ៉ាងតិច៥៨៩នាក់ និងបានវាយប្រហារផ្ទះសម្បែងជាង២០ខ្នង។
ភាគីជម្លោះនីមួយៗបានស្តីបន្ទោសភាគីម្ខាងទៀតដែលបណ្តាលឱ្យមានការដួលរលំនៃបទឈប់បាញ់ដោយបដិសេធលក្ខខណ្ឌដើម្បីបន្តការដោះលែងចំណាប់ខ្មាំងប្រចាំថ្ងៃដែលត្រូវបានកាន់កាប់ដោយក្រុមប្រដាប់អាវុធជាថ្នូរនឹងអ្នកជាប់ឃុំប៉ាឡេស្ទីន។ នៅក្នុងការអនុវត្តបទឈប់បាញ់រយៈពេលប្រាំពីរថ្ងៃបានដោះលែងស្ត្រី កុមារ និងចំណាប់ខ្មាំងបរទេសជាច្រើន។
កាតា ដែលបានដើរតួនាទីកណ្តាលក្នុងកិច្ចខិតខំប្រឹងប្រែងសម្រុះសម្រួលរួមជាមួយនឹងសហរដ្ឋអាមេរិក និងអេហ្ស៊ីប បាននិយាយថា ការចរចានៅតែបន្តជាមួយអ៊ីស្រាអែល និងប៉ាឡេស្ទីន ដើម្បីស្តារបទឈប់បាញ់ឡើងវិញ ប៉ុន្តែថាការទម្លាក់គ្រាប់បែកជាថ្មីរបស់អ៊ីស្រាអែលទៅលើហ្គាហ្សាបានធ្វើឱ្យស្មុគស្មាញដល់កិច្ចខិតខំប្រឹងប្រែងរបស់ខ្លួន។
រដ្ឋមន្ត្រីការពារជាតិអាមេរិក លោក Lloyd Austin បាននិយាយថា ទីក្រុងវ៉ាស៊ីនតោន កំពុងធ្វើការផ្នែកការទូត ដើម្បីស្តារបទឈប់បាញ់ឡើងវិញ។ ក្នុងនោះអាមេរិកនឹងបន្តធ្វើការជាមួយអ៊ីស្រាអែល អេហ្ស៊ីប និងកាតាលើកិច្ចខិតខំប្រឹងប្រែងដើម្បីអនុវត្តការផ្អាកការប្រយុទ្ធឡើងវិញ ដោយបានស្តីបន្ទោសក្រុមហាម៉ាស់ចំពោះការបរាជ័យក្នុងការបំពេញលក្ខខណ្ឌក្នុងការដោះលែងចំណាប់ខ្មាំង។ អ៊ីស្រាអែលបាននិយាយថាបទឈប់បាញ់ អាចបន្តដរាបណាក្រុមហាម៉ាសបានដោះលែងចំណាប់ខ្មាំង១០ នាក់ក្នុងមួយថ្ងៃ។
អង្គការសហប្រជាជាតិបាននិយាយថា ការប្រយុទ្ធគ្នានឹងកាន់តែអាក្រក់ទៅៗ ខណៈភាពអាសន្នផ្នែកមនុស្សធម៌បានកើតឡើងយ៉ាងធ្ងន់ធ្ងរ។ លោក Jens Laerke អ្នកនាំពាក្យការិយាល័យមនុស្សធម៌របស់អង្គការសហប្រជាជាតិនៅទីក្រុងហ្សឺណែវបាននិយាយថា៖ «នរកនៅលើផែនដីបានត្រឡប់ទៅតំបន់ហ្គាហ្សាវិញហើយ»។ ប្រធានជំនួយរបស់អង្គការសហប្រជាជាតិលោក Martin Griffiths បាននិយាយថា៖« ក្នុងរយៈពេលប៉ុន្មានម៉ោង រាប់សិបនាក់ត្រូវបានគេរាយការណ៍ថាបានសម្លាប់ និងរងរបួស។ គ្មានកន្លែងមានសុវត្ថិភាពសម្រាប់ទេ ហើយតិចណាស់ដែលបន្តរស់នៅ»។
អ៊ីស្រាអែលបានប្តេជ្ញាថានឹងកម្ទេចក្រុមហាម៉ាស បន្ទាប់ពីមានការវាយឆ្មក់មួយកាលពីថ្ងៃទី ៧ ខែតុលា ដែលក្រុមសកម្មប្រយុទ្ធបានសម្លាប់មនុស្ស ១.២០០ នាក់ និងចាប់ចំណាប់ខ្មាំង ២៤០ នាក់ពីទឹកដីអ៊ីស្រាអ៊ែល។ ចាប់តាំងពីពេលនោះមកអ៊ីស្រាអែលបានបើកការវាយប្រហារតាមផ្លូវគោក ផ្លូវទឹក ផ្លូវអាកាស ជាការសងសឹកទៅលើក្រុមហាម៉ាស់នៅតំបន់ហ្គាហ្សា។ យោងតាមអាជ្ញាធរសុខាភិបាលប៉ាឡេស្ទីនបាននិយាយថាពលរដ្ឋនៅតំបន់ហ្គាហ្សាជាង១៥,០០០នាក់ត្រូវបានសម្លាប់ និងរាប់ពាន់នាក់កំពុងបាត់ខ្លួន។
ដោយឡែកចំណុចមួយទៀតនៃជម្លោះសម្រាប់អ៊ីស្រាអែល គឺការស្លាប់និងរបួសត្រូវបានគេរាយការណ៍នៅភាគខាងត្បូងប្រទេសលីបង់។ មន្ត្រីលីបង់បាននិយាយថា ការបាញ់ផ្លោងរបស់អ៊ីស្រាអែលបានសម្លាប់មនុស្សបីនាក់កាលពីថ្ងៃទី១ ធ្នូ។ ក្រុមហេសបូឡាហ៍ ដែលគាំទ្រដោយប្រទេសលីបង់ ដែលជាសម្ព័ន្ធមិត្តរបស់ក្រុមហាម៉ាសបាននិយាយថា ខ្លួនបានធ្វើការវាយប្រហារជាច្រើនលើក ទៅលើទីតាំងយោធាអ៊ីស្រាអែល នៅតាមព្រំដែន៕
